A corda sobre o abismo, a micro novela que se inclúe no libro .22,
foi elaborada ao redor de dous temas que me obsesionaban dende había un tempo. A
historia foi medrando como escusa e a ciencia ficción resultou a ferramenta
fundamental para ligar reflexións e trama. Propúxenme tratar o tema do internacionalismo
proletario dende o punto de vista de dúas habitantes dun planeta destino da
deslocalización da produción. Tentei imaxinar a evolución do pensamento crítico
nunha persoa que ofrece a súa forza de traballo como man de obra barata, nun
contexto de pobreza xeneralizada e cunha sociedade na procura permanente de
fórmulas para a evasión. Dende esa perspectiva, afróntase o internacionalismo
proletario ou, máis acorde co texto, interplanetarismo proletario. Por
outra banda, propoño unha reflexión sobre como as emocións inflúen, ou poden
ser utilizadas, para manipular a realidade obxectiva. A presenza de Marx compón
a nota surrealista, inspirada no título da versión galega dun libro de Žižek, O espectro segue a roldar. Este texto sitúase moi lonxe de aspirar a ser unha
obra ensaística. Porén, pretende ampliar o meu universo literario, propondo pouco
precisas reflexións sobre o mundo que me rodea por medio do humor. Establezo un
vago paralelismo co Zaratustra de Nietzsche introducindo no medio da narración imaxes
oníricas que pretenden mostrar, a unha das protagonistas, o camiño para se
converter na súper muller.
Comentários