Notas sobre Terra Nullius

Terra Nullius (MEditora. 2020) é un libro que se centra na violencia estrutural e nas consecuencias desta no individuo que a padece. Trátase, ao mesmo tempo, dun libro sobre a soidade e o illamento como mecanismo reparador dunha relación hostil entre o mundo e o ser. Un personaxe principal que experimenta un proceso de individualización, concepto recollido das obras de Erich Fromm, para emanciparse do poder que exerce, inicialmente, a familia e, con posterioridade, o entorno social no que se desenvolve. Neste sentido, facendo referencia ás dúas partes nas que se divide o texto, pásase da Terra Nullius, Terra de Ninguén, (consecución de certa independencia) á Terra Queimada (a soidade e frustración vital consecuencia desa mesma individualización ou emancipación).

Todos estes conflitos son descritos cun minimalismo expresivo que os describe coa intención de universalizalos, evitando o sensacionalismo propio de escenas prolongadas artificialmente, que coutan a dimensión ampla das emocións descritas e que, ao final, non serían outra cousa máis que momentos dun anecdotario persoal. A modo de exemplo, o conflito intrafamiliar descríbese por medio dunha secuencia na que, desamparada e soa, a protagonista procura entre os contactos do seu teléfono unha persoa coa que falar, detense no número da súa nai e, despois dun tempo de reflexión, decide non pulsar o botón de chamada. Este é un dos instantes nos que se describe o conflito existente entre a protagonista e os seus proxenitores. Segundo transcorre o texto, vanse aportando máis detalles dese conflito, pero sen chegar nunca a desenvolvelo por completo. Aportar pouca información intencionadamente busca que sexa a persoa que se achega ao relato quen imaxine ou dea forma a ese conflito utilizando como base a súa propia experiencia.

Estamos diante dun texto incómodo, que busca na súa brevidade e no estilo dinámico alixeirar a lectura, procurando que quede sempre un pouso sobre o que volver co tempo, incitando á reflexión.

Descarga o libro de balde premendo no título Terra Nullius.